प्रचण्ड पुत्र प्रकाशको निधन

हिमाल एफ एम,
काठमाडौं, ३ मंसिर,

नेकपा माओवादी केन्द्रका अध्यक्ष पुष्पकमल दाहालका छोरा प्रकाशको आकस्मिक निधन भएको छ ।

काठमाडौंको लाजिम्पाटस्थित निवासमा हृदयाघातपछि अचेत अवस्थामा नर्भिक अस्पतालमा भर्ना गरिएका प्रकाशको निधन भएको हो ।

उनलाई आज बिहान ४ बजे नर्भिक अस्पतालमा भर्ना गरिएको थियो ।

प्रकाशको निधन बारे अस्पतालले केही समयमा पत्रकार सम्मेलन गरी आधिकारिक जानकारी दिने तयारी गरेको छ ।

झापाको बिर्तामोडमा रहेका माओवादी केन्द्रका अध्यक्ष दाहाल हेलिकोप्टरबाट काठमाडौं फर्कँदै छन् ।

परिवारका अन्य सदस्यहरु पनि अहिले अस्पतालमा पुग्ने क्रम जारी रहेको छ । अस्पतालमा परिवारका सदस्य र शुभचिन्तकहरुको भीड लागेको छ ।

प्रकाश पूर्वप्रधानमन्त्रीसमेत रहेका दाहालका एक मात्र छोरा हुन् । उनी दाहालको सचिवालयमा काम गर्दै आएका थिए ।

माओवादीले चलाएको सशस्त्र युद्धमा समेत सामेल प्रकाशका दुई श्रीमती र दुई छोराछोरी छन् ।

उनको निधनको खबर फैलिएसँगै अस्पतालमा माओवादी कार्यकर्ता तथा पत्रकारको बाक्लो उपस्थिति रहेको छ ।

शनिबार बेलुकी सामान्य बिरामी भएपछि जाउलो खाएर सुतेका दाहाललाई राति हृदयघात भएको थियो ।

Comments

comments

सम्बन्धित शीर्षकहरु